ភ្នំពេញ៖ នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចតេជោ ហ៊ុន សែន បានប្រាប់ដល់ឯកអគ្គរដ្ឋទូតឡាវថាការផ្ដល់ជំនួយទៅឱ្យឡាវកាលពីកន្លងទៅ គឺជាជំនួយជួយដល់បងប្អូនពេលដែលបងប្អូនមានសេចក្ដីត្រូវការ។ សម្ដេចថ្លែងបែបនេះក្នុងពេលដែលអគ្គរដ្ឋទូតឡាវដែលបានបញ្ចប់អាណត្តិបេសកម្មលោក អ៊ីមផាយ គីនដាវង្ស ចូលជួបសំដែងការគួរសមនិងជម្រាបលានៅព្រឹកថ្ងៃ១៧ ខែធ្នូ ឆ្នាំ២០២១នេះ។

ក្នុងជំនួបនោះលោក អ៊ីមផាយ គីនដាវង្ស បានថ្លែងអំណរគុណដល់សម្ដេចតេជោដែលបានសម្រេចផ្ដល់ជំនួយជួយដល់រដ្ឋាភិបាល និងប្រជាជនឡាវ ជាវ៉ាក់សាំង រថយន្ត ថវិកា និងគ្រឿងបរិក្ខាដល់ប្រទេសនេះក្នុងការប្រយុទ្ធនឹងជំងឹកូវីដ-១៩។

លោកថា៖ «ប្រជាជនឡាវ រដ្ឋាភិបាលឡាវ ពិតជាមានសេចក្ដីរីករាយ និងដឹងគុណជាអនេកប្បការដល់ប្រជាជននិងរដ្ឋាភិបាលកម្ពុជា» ។

ឆ្លៀតក្នុងឱកសានេះលោកក៏ជូនពរដល់រដ្ឋាភិបាលកម្ពុជានៅពេលដឹកនាំអាស៊ាននាឆ្នាំក្រោយទទួលជោជ័យផងដែរ។

នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាជំនួយដែលកម្ពុជាបានជូនដល់ប្រទេសឡាវកាលពីកន្លងទៅជាជំនួយដែលសម្ដេចចាត់ទុកជាការជួយគ្នារវាងបងប្អូននៃប្រទេសទាំងពីរ ដែលត្រូវការគ្នាទៅវិញទៅមក។ សម្ដេចតេជោ បានវាយតម្លៃខ្ពស់លើទំនាក់ទំនងសហប្រតិបត្តិការនៃប្រទេសទាំងពីរកាលពីកន្លងទៅផងដែរ។

ប្រទេសកម្ពុជាបានផ្ដល់ជំនួយប្រឆាំងទៅនឹងជំងឺកូវីដ-១៩ដល់ប្រទេសឡាវចំនួន៣ដងរួចហើយដែលសរុប មានទឹកប្រាក់ប្រមាណ១៣លានដុល្លារអាមេរិក វ៉ាក់សាំង៧០ម៉ឺនដូស រថយន្ត២គ្រឿង ម៉ាស់២លាន១សែននិងបរិក្ខាពេទ្យជាច្រើនទៀត៕